खराब कर्जा बढ्दा पनि मेरो माइक्रोफाइनान्सले यसरी बढायो नाफा

Apr 25, 2025
99

काठमाडौं: मेरो माइक्रोफाइनान्स लघुवित्त वित्तीय संस्थाले चालु आर्थिक वर्षको तेस्रो त्रैमाससम्म १२ करोड ९३ लाख रुपैयाँ खुद नाफा आर्जन गरेको छ, जुन अघिल्लो वर्षको सोही अवधिको तुलनामा ४.४५ प्रतिशतले वृद्धि भएको हो। गत वर्ष सोही अवधिमा कम्पनीले १२ करोड ३८ लाख रुपैयाँ नाफा कमाएको थियो।

खुद ब्याज आम्दानी र सञ्चालन नाफामा भएको वृद्धिले संस्थाको नाफा बढ्न मद्दत गरेको हो। कम्पनीले चैत मसान्तसम्म ७३ करोड ८२ लाख रुपैयाँ खुद ब्याज आम्दानी गरेको छ, जुन अघिल्लो वर्षको तुलनामा २१.१७ प्रतिशतले बढी हो। अघिल्लो वर्ष यस अवधिमा आम्दानी ६० करोड ९२ लाख रुपैयाँ थियो।

सञ्चालन नाफा पनि ५ प्रतिशतले वृद्धि भई १८ करोड ४६ लाख रुपैयाँ पुगेको छ, जबकि अघिल्लो वर्ष यो १७ करोड ५८ लाख रुपैयाँ थियो।

हाल कम्पनीको चुक्ता पुँजी १ अर्ब ४१ करोड रुपैयाँ रहेको छ भने जगेडा कोषमा ७६ करोड ४३ लाख रुपैयाँ जम्मा भएको छ।

यद्यपि, प्रतिसेयर आम्दानी (EPS) भने हल्का घटेर वार्षिक १२ रुपैयाँ १५ पैसा कायम भएको छ, जुन अघिल्लो वर्ष १२ रुपैयाँ ५१ पैसा थियो। कम्पनीको प्रतिसेयर नेटवर्थ भने १५२.९१ रुपैयाँ रहेको छ।

तर, खराब कर्जाको अनुपात ७.६१ प्रतिशतबाट बढेर ९.४९ प्रतिशतमा पुगेको देखिएको छ।