बैंकिङ प्रणालीमा तरलता व्यवस्थापन गर्न राष्ट्र बैंकले ५० अर्ब रुपैयाँ तान्ने

Jun 25, 2025
233

बैंकिङ प्रणालीमा अत्यधिक तरलता संचित भएपछि नेपाल राष्ट्र बैंकले तरलता व्यवस्थापन गर्न ५० अर्ब रुपैयाँ बराबरको निक्षेप संकलन गर्ने भएको छ। केन्द्रीय बैंकले आज असार ११ गते यो रकम संकलन गर्न बैंक तथा वित्तीय संस्थाहरूसँग बोलकबोल आह्वान गरेको हो।

राष्ट्र बैंकका अनुसार निक्षेप दिन इच्छुक ‘क’, ‘ख’ र ‘ग’ वर्गका बैंक तथा वित्तीय संस्थाहरूले घटीमा १० करोड रुपैयाँ र बढीमा ५ करोडको गुणात्मक अंकमा बोलकबोल प्रस्ताव गर्न सक्नेछन्। बोलकबोल निःशेष भाग जाने गरी गरिनुपर्नेछ।

निक्षेप संकलन बहुब्याजदर प्रणालीमा आधारित हुनेछ, जसअनुसार संस्थाहरूले विभिन्न ब्याजदरमा बहुबोलकबोल पेश गर्न सक्नेछन्। यसले प्रतिस्पर्धात्मक बजार दरको निर्धारणमा सहजीकरण गर्ने अपेक्षा गरिएको छ।

राष्ट्र बैंकले उक्त निक्षेप संकलन उपकरणअन्तर्गत भदौ ११ गते साँवा तथा ब्याज भुक्तानी गर्ने जनाएको छ। यस कदममार्फत अल्पकालीन तरलता व्यवस्थापन गरी बजारमा ब्याजदरमा सन्तुलन ल्याउने उद्देश्य लिइएको हो।

यो उपायले विशेषगरी मौद्रिक नीतिमा घोषित सन्तुलित तरलता व्यवस्थापन रणनीतिअनुसार केन्द्रीय बैंकको सक्रिय भूमिका झल्काउने विश्लेषकहरूको धारणा छ।

Share Training Near Me