साताको अन्तिम दिन नेप्से ९.२२ अंकले घट्यो, कारोबार रकम पनि न्यूनतममा
साताको अन्तिम कारोबार दिन नेपाली शेयर बजारको प्रमुख परिसूचक नेप्से ९.२२ अंकले घटेर २७५७.९७ विन्दुमा बन्द भएको छ। अघिल्लो दिनको गिरावटलाई निरन्तरता दिँदै यस दिन सेन्सेटिभ इन्डेक्स ०.६९ अंक, फ्लोट इन्डेक्स ०.५० अंक र सेन्सेटिभ फ्लोट इन्डेक्स ०.२१ अंकले घटेका छन्।
यस दिन कुल कारोबार रकम पनि घटेर ५ अर्ब २ करोड रुपैयाँमा सीमित भएको छ। यसअघि बुधबारको कारोबार ५ अर्ब २० करोड रुपैयाँ थियो। बजारमा ३१९ स्टकको ५६,८२४ पटकको कारोबारमा १ करोड ६८ लाख ५५ हजार कित्ता शेयर खरिद–बिक्री भएको हो।
कम्पनीगत दृष्टिकोणले हेर्दा, विकास हाइड्रोपावरको शेयरमूल्य लगातार दोस्रो दिन पनि सकारात्मक सर्किट लेभलमा पुगेको छ। यसको मूल्य ३२ रुपैयाँ १० पैसा बढेर ३५३ रुपैयाँ ४० पैसामा पुगेको हो। यस्तै, सामुदायिक लघुवित्तको मूल्य करिब ५ प्रतिशतले बढ्दा, जनउत्थान सामुदायिक लघुवित्त ४.६५ प्रतिशतले घटेको छ। अन्य स्टकहरूमा वृद्धि दर ३ प्रतिशतभन्दा कम रह्यो।
कारोबार रकमको आधारमा, यस दिन हिमालयन रि इन्स्योरेन्स शीर्ष स्थानमा रह्यो, जसमा २४ करोड ९ लाख रुपैयाँ बराबरको कारोबार भयो। त्यसपछि नेपाल पुनर्बीमा कम्पनीमा २० करोड र बलेफि हाइड्रोपावरमा १४ करोड रुपैयाँभन्दा बढीको कारोबार भएको छ।
उपसमूहगत हिसाबले, १३ मध्ये १२ उपसमूह घटे भने केवल निर्जीवन बीमा उपसमूह ०.१४ प्रतिशतले बढ्यो। अन्य उपसमूहहरूको गिरावट दर भने १ प्रतिशतभन्दा कम थियो।
विश्लेषण :
-
फन्डामेन्टल पक्षबाट, लगानीकर्ताहरू हाल केही ठूलो नीतिगत निर्णयको प्रतिक्षामा रहेका छन्। विशेष गरी बैंकलाई शेयरमा लगानी गर्न सजिलो बनाउने र मार्जिन ट्रेडिङ सहज बनाउने माग उच्च छ। यी विषयमा केन्द्रीय बैंक अन्तिम तयारीमा रहेको बताइएकाले आगामी दिनमा बजारमा सकारात्मकता आउन सक्ने अपेक्षा गरिएको छ।
-
प्राविधिक पक्षबाट, विश्लेषक अजित खनालका अनुसार बजारले ५० दिने मुभिङ एभरेजलाई ब्रेकडाउन गर्दै तल बन्द भएको छ। RSI पनि ४० भन्दा तल पुगेको छ, जसले बजारको कमजोरी संकेत गर्दछ। तर, ६१% रिट्रेसमेन्ट स्तरमा बजारले केही सकारात्मक प्रतिक्रिया दिन सक्ने अनुमान गरिएको छ। यदि सो स्तर पनि भत्किएमा बजार अझ नकरात्मक हुन सक्ने चेतावनी दिइएको छ।
थप रूपमा, आजको कारोबार रकम चैत २६ पछि सबैभन्दा न्यून रह्यो। साथै, बजारले १२:१० बजेपछि लगातार घट्ने प्रवृत्ति देखायो र नयाँ उच्चतम स्तर बनाउन सकेन। ठूला ब्रोकरहरूको कारोबारमा पनि कुनै असामान्य गतिविधि देखिएन, जसले बजारको निस्तेज अवस्थालाई पुष्टि गरेको छ।
Leave a Comments
Comments
Popular
Recent Post
No comments yet.