सिमेन्ट उत्पादक संघ र निर्माण व्यवसायी महासंघबीच सहकार्यका लागि सहमति
सिमेन्ट उत्पादक संघ र नेपाल निर्माण व्यवसायी महासंघबीच निर्माण क्षेत्रका विभिन्न पक्षमा सहकार्य र समन्वय बढाउन सहमति भएको छ। आइतबार उद्योग, वाणिज्य तथा आपूर्ति मन्त्री दामोदर भण्डारी र वाणिज्य आपूर्ति तथा उपभोक्ता संरक्षण विभागका महानिर्देशक राजन पौडेलको उपस्थितिमा यो सहमति सम्पन्न भएको हो।
सिमेन्ट उत्पादक संघका प्रतिनिधि र निर्माण व्यवसायी महासंघका साथै निर्माण व्यवसायसँग सम्बन्धित चारवटा व्यवसायीक संघका प्रतिनिधिबीच भएको छलफलपछि, औद्योगिक उत्पादन र निर्माण गतिविधिमा सहकार्य गर्दै अघि बढ्ने प्रतिबद्धता जनाइएको छ।
सिमेन्ट आपूर्तिमा सहजता
सहमति अनुसार सिमेन्ट उद्योगहरूले मागअनुसार सिमेन्टको सहज आपूर्ति सुनिश्चित गर्न आफ्नो उत्पादन क्षमतामा सुधार ल्याउने भएका छन्। यसले विकास निर्माणका काममा ढिलाइ नहुनुका साथै सिमेन्ट आपूर्तिमा स्थिरता कायम गर्ने अपेक्षा गरिएको छ।
विद्युत आपूर्ति र औद्योगिक वातावरण सुधार
औद्योगिक सञ्चालनमा देखा परेको प्रमुख समस्या, जस्तै विद्युत कटौती र लोडसेडिङ अन्त्य गर्न उद्योग मन्त्रालयले पहल गर्ने सहमति भएको छ। यसले सिमेन्ट उद्योगहरूलाई निर्वाध रूपमा सञ्चालन गर्न मद्दत पुग्नेछ।
समन्वयको प्रभाव
सिमेन्ट उत्पादक संघ र निर्माण व्यवसायी महासंघले एकअर्काका समस्याहरूलाई बुझेर समाधानमा सहकार्य गर्ने प्रतिबद्धता जनाएका छन्। यो सहकार्यले निर्माण क्षेत्रका काममा हुने ढिलासुस्ती घटाउने र निर्माण सामग्रीको आपूर्तिमा स्थिरता ल्याउनेछ।
आर्थिक र व्यवसायिक
यस समझदारीले निर्माण लागत घटाउन, सिमेन्ट उद्योगको उत्पादन क्षमता विस्तार गर्न, र निर्माण कार्य समयमै सम्पन्न गर्न मद्दत गर्नेछ। साथै, यो समन्वयले लगानीमैत्री वातावरण निर्माण गरी राष्ट्रिय अर्थतन्त्रलाई गति दिन सक्ने विश्वास गरिएको छ।
सहमतिपछि निर्माण क्षेत्रको विश्वसनीयता बढ्ने र राष्ट्रिय विकास निर्माणका कामहरूलाई तिव्रता दिन सकारात्मक प्रभाव पर्ने अपेक्षा गरिएको छ।
Tags
Leave a Comments
Comments
Popular
Recent Post
No comments yet.