खराब कर्जा घटेपछि सामुदायिक लघुवित्तको नोक्सानीमा कमी

May 9, 2025
6

काठमाडौं : सामुदायिक लघुवित्त वित्तीय संस्था लिमिटेडले खराब कर्जा घटाएपछि चालु आर्थिक वर्षको तेस्रो त्रैमासमा नोक्सानी घटाउन सफल भएको छ। कम्पनीले यस अवधिमा १ करोड १ लाख रुपैयाँ खुद घाटा व्यहोरेको छ, जुन अघिल्लो वर्षको सोही अवधिको ४ करोड ५९ लाख रुपैयाँ घाटाको तुलनामा निकै कम हो।

संस्थाको खराब कर्जा अनुपात ९.८६ प्रतिशतबाट घटेर ४.९७ प्रतिशतमा झरेको छ। यसले प्रोभिजनका लागि छुट्याउनुपर्ने रकममा कमी ल्याएको छ। साथै, खुद ब्याज आम्दानी पनि ५२.१२ प्रतिशतले वृद्धि भई ७ करोड ३५ लाख रुपैयाँ पुगेको छ। यी सुधारहरूले घाटा घटाउन सहयोग गरेका हुन्।

हाल कम्पनीको चुक्ता पुँजी १७ करोड ८ लाख रुपैयाँ छ भने जगेडा कोषमा १ करोड ३१ लाख रुपैयाँ रहेको छ। त्रैमासिक अवधिसम्म कम्पनीको वार्षिक प्रतिसेयर आम्दानी (EPS) ७.७८ रुपैयाँ ऋणात्मक छ, जबकि प्रति सेयर नेटवर्थ १०७.७३ रुपैयाँ कायम छ।