नेप्से २७ सय विन्दु पार गर्दै , लगानीकर्ता आशावादी
लामो समयदेखि २६ सयको सीमामा समायोजन हुँदै आएको नेप्से परिसूचकले पाँच दिनको लगातार वृद्धिपछि अन्ततः २७ सयको मनोवैज्ञानिक सीमा पार गरेको छ। वैशाख ७ पछि पहिलोपटक नेप्से २७०३.९६ विन्दुमा पुगेर बन्द भएको हो।
पछिल्ला पाँच दिनमा बजार १०० अंकभन्दा बढीले बढेको छ— आइतबारदेखि बिहीबारसम्म क्रमशः २६.५३, ९.१९, २८.९१, ३४.४२ र ९.१४ अंकको वृद्धिले बजारमा करेक्सन सकिएको र लगानीकर्ताको आत्मविश्वास बढ्दै गएको संकेत देखिएको छ।
बजारको सहयोगी वातावरण
बैंकिङ प्रणालीमा प्रशस्त तरलता, ऐतिहासिक न्यून ब्याजदर, नेपाल राष्ट्र बैंकको नीतिगत स्पष्टता र आसन्न मौद्रिक नीतिप्रतिको सकारात्मक अपेक्षाले बजारलाई थप ऊर्जा प्रदान गरेको विश्लेषकहरू बताउँछन्। यसैबीच, असार उत्तरार्द्धबाट सुरु हुने परम्परागत शेयर बजारको 'सिजन' पनि बजारको ट्रेन्डसँग मेल खाएको देखिन्छ।
कारोबार विश्लेषण
सूचक वृद्धि भए पनि बिहीबारको कारोबार रकम थोरै घटेर ९ अर्ब ६४ करोड रुपैयाँमा सीमित रह्यो, जुन अघिल्लो दिनको ९ अर्ब ७४ करोडभन्दा कम हो। यसलाई विश्लेषकहरूले लाभ सुरक्षित गर्ने प्रवृत्तिको संकेत मानेका छन्।
१३ उपसमूहमध्ये ८ हरियालीमा र ५ रातो क्षेत्रमा बन्द भए। वित्त समूह ४.०९% वृद्धिसँग अग्रपंक्तिमा रहँदा जीवन बीमा र निर्जीवन बीमा क्रमशः २.२८% र २.१७% ले उकालो लागे। व्यापार समूह भने १.२९% ले घट्दै सबैभन्दा कमजोर प्रदर्शन गर्यो।
विशेष स्टक चालचलन
नेपाल फाइनान्सको शेयर सर्किट लेभलमा पुगेको छ भने खानीखोला हाइड्रोपावर र समृद्धि फाइनान्सका सेयर ७% भन्दा बढीले बढेका छन्। विपरीत, सप्तकोशी डेभलपमेन्ट बैंक १०% ले घट्दै कमजोर स्टकको रूपमा चिनियो। कारोबार रकमको हिसाबमा बुटवल पावर कम्पनी (३१.६८ करोड), साहस उर्जा (२७ करोड+) र सप्तकोशी डेभलपमेन्ट बैंक (२६ करोड+) अग्रस्थानमा रहे।
प्राविधिक विश्लेषण अनुसार बजार बलियो
पछिल्लो पाँच दिनको निरन्तर वृद्धिले बजारमा ट्रेन्ड रिवर्सल को स्पष्ट संकेत देखिएको छ। बजार अब Higher Low (HL) र Higher High (HH) संरचना बनाउन थालेको छ, जुन दीर्घकालीन बुल ट्रेन्डको सूचक हो। साथै, नेप्से २०० दिनको मूभिङ एभरेजभन्दा माथि टिक्न सफल भएको छ।
हाल बजार २७२० आसपासको पुरानो प्रतिरोध क्षेत्रमा प्रवेश गरिरहेको छ। यदि यो स्तर पार भयो भने बजारले अगिल्लो लक्ष्य २७८०–२८०० विन्दु नाघ्ने प्रक्षेपण गरिएको छ।
ब्रोकर गतिविधि
ठूला १० ब्रोकरमध्ये ६ ले बढी बाई गरेका छन्। ब्रोकर नम्बर ५८ ले सबैभन्दा धेरै (१.०५ अर्ब) कारोबार गर्यो। यसैबिच, ब्रोकर नम्बर ४९ बाट कृषी विकास बैंकको ५२ हजार कित्ता शेयर खरिद गरिएको छ, जुन संस्थागत लगानीको संकेत मानिएको छ।
बजार प्राविधिक रूपमा बलियो देखिन थालेको छ। सेक्टर रोटेशन, २००MA माथिको क्लोज र स्थिर HL/HH संरचनाले नयाँ उचाइको सम्भावना देखाएको छ। यद्यपि, आगामी मौद्रिक नीति र चौथो त्रैमासिक वित्तीय विवरणले बजारको दीर्घकालीन दिशा निर्धारण गर्ने भएकाले लगानीकर्ताले विवेक र तथ्यमा आधारित निर्णय लिनुपर्ने आवश्यकता अझै पनि उत्तिकै महत्त्वपूर्ण रहेको छ।
Tags
Leave a Comments
Comments
Related post
Popular
Recent Post
No comments yet.